咱所聽見的，有是誰信啊？
耶和華的手向是誰顯明啊？
因為他在祂的面前生長親像此此的樣，
亦親像根發在乾地；
他無好形狀無威儀；
咱看見他亦無好形容，可使咱欣慕他，
他受看輕，被人放揀，
受多多苦痛，常常遇著憂悶；
他受看輕，親像被人掩面不看的一樣；
咱亦無尊重他。
他實在擔當咱的憂悶，負咱的苦痛；
總是咱以為他受責罰，被上帝打，又受苦楚。
若是他為著咱的過失受傷，
為著咱的罪過受害；
他擔當刑罰，咱得著平安；
他受鞭打，咱得著醫好。
咱攏親像羊迷路；
耶和華使咱眾人的罪攏歸在他身上。
他受壓迫遇著艱苦，尚且無開嘴。
他親像羊仔牽到受殺的地；
又親像羊在剪毛的人的面前無出聲，
他亦如此無開嘴；
他由壓迫及審判受取去；
在他的世代，是誰想著他從活人的地受剪除？抑是因為我的百姓的罪過受打啊？
他雖然無行強暴，嘴亦無有詭詐，
尚且在他的死與惡人同墓，也與富人相與。
他放揀生命到死，他也列在罪犯的中間；
總是他擔當多多人的罪，又替罪犯祈禱。
